မောင်ချောနွယ်သို့ အင်တာဗျူး (၂)

#မောင်ချောနွယ်သို့အင်တာဗျူး (၂)

မေးသူ = လှကျော်နေ
ဖြေသူ = မောင်ချောနွယ်
------------------------------------

ကဗျာဆရာ မောင်ချောနွယ်နဲ့ စကားပြောချင်လို့။

ဘယ်ခေါင်းစဉ်နဲ့ စကားပြောမှာလဲ။

ခေတ်ပေါ်ကဗျာအကြောင်း ဆွေးနွေးပွဲဆိုတဲ့
ခေါင်းစဉ်နဲ့ပေါ့။

အဲဒီခေါင်းစဉ်တော့ မကြိုက်ဘူးဗျာ။
တခြားခေါင်းစဉ်ကို ရွေးကြရအောင်။

ခေါင်းစဉ်က အရေးမကြီးပါဘူး။ ပြောတဲ့အကြောင်း
အရာတွေက အရေးကြီးပါတယ်။

သဘောတူတယ်။ ကဲ… ဘယ်က စဆွေးနွေးမလဲ။

မောင်ချောနွယ်အနေနဲ့ ကဗျာကို ဘယ်လောက်
ယုံကြည်သလဲ။

ကမ္ဘာကြီးရဲ့ဝိညာဉ်ဟာ ကဗျာ၊ ကဗျာရဲ့ဝိညာဉ်ဟာ
မောင်ချောနွယ်၊ မောင်ချောနွယ်ရဲ့ဝိညာဉ်ဟာ
ကဗျာပါပဲ။

ဒါဆိုရင် ဆွေးနွေးပွဲခေါင်းစဉ်ကို တပ်လိုက်တော့မယ်။

ဘယ်လိုတပ်မှာလဲ။

မောင်ချောနွယ် (သို့မဟုတ်) ကမ္ဘာ့ဝိညာဉ်နှင့်
စကားပြောခြင်းဆိုရင် သင့်မယ်ထင်တယ်။

ဒီခေါင်းစဉ်ကို သဘောတူတယ်ဗျာ။
ဆက်ဆွေးနွေးကြစို့။

မောင်ချောနွယ်အနေနဲ့ ရင်မှဖြစ်သော အနုပညာ
ပင်စည်က ပင်မှည့်တေးဖြစ်တဲ့ ကဗျာသစ်သီးတွေဟာ
တစ်နှစ်မှာ ဘယ်နှလုံးခန့်ကြွေတတ်ပါသလဲ။

ဟုတ်ပါတယ်။ ကျွန်တော်ဟာ အနုပညာပစ္စည်း
တစ်ရပ်ဖြစ်တဲ့ ကဗျာသစ်သီးကို ရင့်မှည့်အောင်
လုပ်ပြီးမှ အလိုလိုကြွေကျတတ်ပါတယ်။ အများ
နားလည်အောင်ပြောရရင်တော့ တစ်နှစ်မှာ ကဗျာ
လေး ငါး ခြောက်ပုဒ်ပဲ ရေးဖြစ်ပါတယ်။

ဒါလောက် ကဗျာအထွက်ကျဲရတာ ကဗျာတစ်ပုဒ်ရဲ့
တန်ဖိုးဟာ မြမာလာဖိနပ်တစ်ရန်ဖိုးလောက် မရှိလို့
လား။

ပင်မှည့်ကဗျာများ သီးကြွေမှုနည်းရတာက ကျွန်တော်
ရေးအားမကောင်းတာ၊ ရေးအားညံ့တာလည်း ပါပါ
တယ်။

ကိုလှကျော်နေပြောသလို ကဗျာစာမူခနည်းလို့ ခံပြင်း
တာလည်း ပါပါတယ်။ တကယ်တမ်း ပြောရရင်တော့
ငွေက ဒါလောက်အဓိကမကျပါဘူး။ ကဗျာဖြစ်ပြီးရော
မရေးချင်တာက အဓိကပါ။

ကဗျာတစ်ပုဒ်ကို ဒါလောက်အချိန်ယူပြီး ရေးတတ်
သလား။

တစ်ခါတစ်ရံ တစ်နှစ်မှ သုံးပုဒ်တည်းပဲရေးဖြစ်တဲ့နှစ်
ရှိပါတယ်။ ''ဆတ်သွား''လို ကဗျာမျိုးကျတော့
တစ်ပုဒ်ကို သုံးနှစ်ကြီးများတောင် ကြိုးစားပမ်းစား
ရေးမိပါတယ်။ ပြောရရင်တော့ ကျွန်တော့်ရဲ့ညံ့ဖျင်း
ပုံများပေါ့ဗျာ။

မောင်ချောနွယ်ဟာ ကဗျာဆရာစစ်စစ်ဘဝကို
အတိအကျနေထိုင်တုန်းပဲလား။

ဟုတ်ကဲ့။ အတိအကျကို နေထိုင်နေဆဲပါပဲချင်ဗျာ။
အသက် ၅၀-အရွယ်ကျရင်တော့ အတိအကျ နေထိုင်
မယ်လို့တော့ အတိအကျ မပြောနိုင်ပါဘူး။

ကဗျာဆရာဘဝကို အတိအကျနေထိုင်ဆဲလို့
ဘာကြောင့် ပြောနိုင်ပါသလဲ။

ကျွန်တော် ဗီဒီယိုမရိုက်ဘူး၊ ဗီဒီယိုဇာတ်ညွှန်း မရေး
ဘူး၊ ဇာတ်ဝတ္ထု မရေးဘူး၊ ဆောင်းပါးမရေးဘူးဗျာ၊
ဒါတွေအားလုံးဟာ ကျွန်တော်တတ်တဲ့ အလုပ်တွေ
ချည်းပါပဲ။

တချို့ကဗျာဆရာတွေတော့ ဇာတ်ညွန်းရေးနေကြ
ပြီနော်။

ဒါက သူတို့ကိစ္စပါ။

အသက် ၅၀-အရွယ်ကျ ကဗျာဆရာဘဝကို အတိ
အကျနေထိုင်ချင်မှ နေထိုင်မယ်ဆိုတဲ့စကားက ခု
အသက်ဘယ်လောက်ရှိပြီမို့လဲ။

အသက်ကို မေးတာထက် ကဗျာဆရာလုပ်သက်ကို
မေးရင် ပိုကောင်းမယ်ထင်တယ်။ လူတစ်ယောက်မှာ
အသက်က အရေးမကြီးပါဘူး။ တန်ဖိုးရှိတဲ့လုပ်ရပ်က
ပိုအရေးကြီးပါတယ်။

မောင်သင်းခိုင်နဲ့ အင်တာဗျူးတုန်းက အနုပညာဆိုတာ
ဘဝရဲ့ဝဋ်နာကံနာလို့ ပြောခဲ့တဲ့စကားကို အစာမကြေ
ဘူး။ ဝဋ်နာကံနာအကြောင်းကို ထပ်ရှင်းပါဦး။

ဒါက ကျွန်တော့်ရဲ့ ယုံကြည်မှုပဲ။ ကျွန်တော်ဟာ
ကဗျာကို ချစ်ခြင်းနဲ့အတူ ကုဋ္ဌနူနာရောဂါသည်
တစ်ယောက်လိုပဲ ခြေမ,ကြွေ၊ လက်မ,ကြွေ၊ နားရွက်
ကြွေ၊ နှာခေါင်းကြွေနဲ့ အားလုံးကြွေသွားဖို့ပဲ ရှိတယ်။
မိုဒီဂလျာနီတို့ ဂေါ်ကီတို့လိုပေါ့။ ကျွန်တော်လည်း
ကဗျာကို ကိုးကွယ်မိတော့ ဘာတတ်နိုင်မှာလဲ။
ဒီဘဝမှာ ကျွန်တော် ဆုတ်ပေးလို့မရတော့ဘူး။
ကျွန်တော့်သမိုင်းကို ကျွန်တော် ဖျက်ဆီးခြေမွပစ်မှာ
မဟုတ်ဘူး။ ကျွန်တော်ကိုယ်တိုင် ကြေမွချင်ကြေမွ
သွားပါစေ။ ဆက်ပြီး ကဗျာကို ချစ်သွားဖို့ အဆင်သင့်
ပါပဲ။

ဒါဆိုရင် ကဗျာဆိုတဲ့အနုပညာပစ္စည်းကို မောင်ချော
နွယ်က ဘာကြောင့် ထာဝရချစ်သူ၊ ထာဝရရန်သူလို့
ပြောခဲ့ သုံးခဲ့တာလဲ။

ဒါက ကျွန်တော်တစ်ဦးတည်းရဲ့ခံစားချက်ပါ။ အများနဲ့
TUNING မညှိနိုင်ပါဘူး။ အသံညှိစရာ မလိုပါဘူး။
ကျွန်တော့်ခံစားချက် မှားကောင်းမှားမယ်။ မှန်ကောင်း
မှန်မယ်။ ထာဝရချစ်သူဆိုတာကတော့ ကဗျာကို
ကျွန်တော်က အသက်နဲ့လဲပြီး ချစ်မိတာကိုး။ ထာဝရ
ရန်သူဆိုတာကတော့ တစ်ခါတစ်ရံ ကျွန်တော်ဟာ
ကဗျာကို လိုချင်တယ်။ ကဗျာက မရဘူး။ အမြဲတမ်း
တိုက်ခိုက်ထွက်ပြေးနေတယ်။ ကဗျာကို ဘယ်လိုရှာ
ရှာ တွေ့သင့်မှတွေ့တယ်။ တစ်ခါတစ်ခါတော့ ဝုန်းခနဲ
ဒိုင်းခနဲ ချုံခိုတိုက်ခိုက်ပြီး ကဗျာနဲ့ ကျွန်တော် လှံစွပ်
ထိုးတိုက်ပွဲတွေ ဆင်နွှဲရတယ်။ ကျွန်တော့်ဘဝကို
ဒုက္ခအပေးဆုံးဟာ ကဗျာပဲ။ ဒါကြောင့် ကဗျာကို
ကျွန်တော်က ရန်သူလို့ သတ်မှတ်တယ်။ အချစ်ဆုံး
ရန်သူလို့ ပြောရမလား မသိဘူး။ ဒါကြောင့် ကဗျာဟာ
ထာဝရရန်သူ၊ ထာဝရချစ်သူလို့ ကျွန်တော် ပြောမိ
တယ်ဗျာ။

မောင်ချောနွယ်ဟာ ယနေ့အချိန်အထိ ကဗျာဆရာ
ဆိုတဲ့ဂုဏ်ပုဒ်ကို မြတ်မြတ်နိုးနိုးဖက်တွယ်ပြီး ရင်ဘတ်
နဲ့လယ်ထွန်စားသောက်နေတယ်ဆိုတာ တကယ်ပဲ
လား။

နှလုံးသားနဲ့ ကဗျာတွေကို လိုက်ရှာနေတယ်။
ရင်ဘတ်ကို ထွန်သွားလိုသဘောထားပြီး ရင်ဘတ်နဲ့
လယ်ထွန်တယ်လို့ ကျွန်တော် သုံးနှုန်းခဲ့တာပါ။
ရင်ထဲမှာ ထိရှခံစားမှုမရှိဘဲ ကျွန်တော် ကဗျာမရေး
ဖြစ်တာကတော့ အမှန်ပါပဲ။

မောင်ချောနွယ်ရဲ့ ချက်ကြိုးမြှုပ်ရာဒေသကို ပြောပြပါ။

ရန်ကုန်မြို့ရှိ ဒပ်ဖရင် အမျိုးသမီးဆေးရုံမှာပဲ
ချက်ကြိုးဖြတ်ခဲ့ပါတယ်ဗျာ။ မွေးဇာတိက ရန်ကုန်မြို့၊
ကပ္ပလီကွက်သစ်၊ ၁-လမ်းပါ။ ၁၁-နှစ်သားအထိ
ရန်ကုန်မှာ အတိအကျ နေထိုင်ကြီးပြင်းခဲ့ပါတယ်။
နောက်မှ အဖေက အစိုးရဝန်ထမ်းမို့ နယ်တွေမှာ
ပြောင်းရွှေ့နေထိုင်ခဲ့ပါတယ်။

မောင်ချောနွယ်ရဲ့ မိဘတွေအမည်က…

ဦးကျော်မြင့်၊ ဒေါ်သန်းသန်းတို့ပါ။

မိဘတွေ အလုပ်အကိုင်က…

ကျွန်တော့်အဖေက နယ်ပိုင်ဝန်ထောက်၊
ကျွန်တော့်အမေက မှီခိုပါ။

မောင်ချောနွယ်မှာ မောင်နှမသားချင်း ဘယ်နှယောက်
ရှိသလဲ။

ငါးယောက်ရှိပါတယ်။ ကျွန်တော်ဟာ အကြီးဆုံးနဲ့
အမိုက်ဆုံးသားတစ်ယောက်ပေါ့။

မောင်ချောနွယ်တစ်ယောက် တက္ကသိုလ်ပညာ
သင်ဖူးသလား။

မသင်ဘူးပါဘူး။ ကျွန်တော် ၁၀-တန်းပဲ
အောင်ပါတယ်။

မောင်ချောနွယ်တစ်ယောက် ဝန်ထမ်းဘဝ
ကျင်လည်ဖူးသလား။

ဝန်ထမ်းလုပ်ခဲ့ဖူးပါတယ်။ ပုသိမ်-မုံရွာလမ်း၊ လမ်း
ဖောက်ဆောက်လုပ်ရေးမှာ စာရေးဝင်လုပ်ဖူးပါတယ်။
လက်ထောက်စာကြည့်တိုက်မှူးလည်း လုပ်ဖူးပါတယ်။
မြို့ဝင်ကြေးဂိတ်စောင့်လည်း လုပ်ဖူးပါတယ်။ ဈေး
ကောက်လည်း လုပ်ဖူးပါတယ်။ ကုန်သည်ပွဲစားလည်း
လုပ်ဖူးပါတယ်။

မောင်ချောနွယ်ရဲ့ မိသားစုတပ်ဖွဲ့အကြောင်းလေး
ပြောပြပါဦး။

၁၉၇၁-ခုနှစ်မှာ မမြင့်မြင့်စိန် (ခေါ်) မမမြင့်နဲ့ ညားခဲ့
ပါတယ်။ ၁၉၇၂-ခုနှစ်မှာ ရန်ကုန်မြို့၊ ကြို့ကုန်း ၁-
လမ်းမှာ နေခဲ့ဖူးပါတယ်။

အိမ်ထောင်ကျစမှာပေါ့နော်။

ဟုတ်ပါတယ်။ အိမ်ငှားနေခဲ့တာပါ။ အဲဒီမှာ ဝင်းမင်း
ထွေး၊ သုခမိန်လှိုင်၊ ခိုင်အောင်(မြို့ဟောင်း)၊ မြေဝါ၊
ဘုန်းနွယ်လင်း၊ ရန်ပိုင်၊ သခွပ်နီ အစရှိသူတို့
ကျွန်တော့်အိမ်မှာ စုစည်းခဲ့ကြဖူးပါတယ်။

မောင်ချောနွယ် သားသမီး ဘယ်နှယောက်
ထွန်းကားခဲ့သလဲ။

သားသမီး ၃-ယောက် ထွန်းကားခဲ့ပါတယ်။
(၁) မဟူရာကိုကို၊ (၂) နေခြည်ထက်ထက်၊
(၃) မေမွန်ရှိုင်းတို့ သုံးယောက်ဖြစ်ပါတယ်။
၇၂-တုန်းက မဟူရာကိုကိုရဲ့မွေးနေ့မှာ သုခမိန်လှိုင်၊
ဖော်ဝေး၊ သခွပ်နီ၊ ဝင်းမင်းထွေး၊ ယနေ့ နာမည်ကြီး
အားလုံး ကျွန်တော့်သမီးရဲ့မွေးနေ့ကို တက်ဖူးခဲ့ကြ
ပါတယ်။

သင်္ဂြိုဟ်စက်ထဲကို ကိုယ့်ဘဝကိုယ်သွင်းပြီး မီးပြင်း
တိုက်ပြာချလိုက်မှ ထွက်လာတဲ့အခိုးအငွေ့တွေက
တစ်ဆင့် အနုပညာကို မွေးဖွားတည်ဆောက်တယ်
ဆိုတာက အဲဒီလိုမွေးဖွားတည်ဆောက်မှ အနုပညာ
အစစ်အမှန်ကို ရရှိမယ်လို့ထင်တဲ့အတွက်လား။

အဲဒီလို ထင်တာမဟုတ်ပါဘူး။ အဲဒီလို ယုံကြည်
တာပါ။ ဘဝကို အလောင်အကျွမ်းခံပြီးမှ ရရှိတဲ့
အနုပညာမှ အနုပညာအစစ်အမှန်ပါ။

မော်ဒန်ကဗျာရဲ့ခရီးဟာ ၁၉၇၀-ခုနှစ်က စတင်ရေ
တွက်ရင် ငွေရတုသဘင်ခရီး ၂၅-နှစ်ကျော် ၂၇-နှစ်
ထဲ ရောက်ခဲ့ပြီဆိုတာ လက်ခံသလား။

ဆယ်စုနှစ် နှစ်ခု၊ နှစ် ၂၀-လောက်ပဲ ရှိသေးတယ်လို့
သတ်မှတ်ပါတယ်။

မောင်ချောနွယ် ကဗျာစရေးတော့ လေးလုံးစပ်နဲ့ပဲ
ကဗျာစတင်ရေးခဲ့တာလား။

ဟုတ်ပါတယ်။ ၆၇-၆၈ ခုနှစ်မှာပဲ ရုပ်ရှင်ပဒေသာ၊
လျှို့ဝှက်သည်းဖိုမဂ္ဂဇင်းတို့မှာ လေးလုံးစပ် ကဗျာ
လေးတွေကို စတင်ရေးပို့ခဲ့ပါတယ်။

မောင်ချောနွယ်ပြောတဲ့ စကားတစ်ခွန်းကြားဖူးတယ်။
ခေတ်ပေါ်ကဗျာရ့ရနံ့ကို ကွယ်လွန်သူ ကဗျာဆရာ
မောင်လေးအောင်ဆီက ရရှိခဲ့တယ်ဆိုတာ ဟုတ်ရဲ့
လား။

ဟုတ်ပါတယ်ဗျာ။ ကဗျာဆရာ မောင်လေးအောင်
ဆီကပဲ ကျွန်တော့်အနေနဲ့ ခေတ်ပေါ်ကဗျာရနံ့ကို
အနံ့ခံရရှိခဲ့တာပါ။ ဒီစကားကို ယုံယုံကြည်ကြည်နဲ့
ကျွန်တော် ခေါင်းခံပါတယ်။ ပြောလည်း ပြောရဲတယ်
ဗျာ။ အများသဘောမတူရင်လည်း ဒါ ကျွန်တော်
တစ်ဦးတည်းရဲ့အယူအဆပါ။ ကွဲလွဲခွင့်ရှိပါတယ်။

တော်လှန်ကဗျာစာအုပ်မှာ ပါဝင်ရေးသားခဲ့တဲ့
မောင်ချောနွယ်ရဲ့ကဗျာဟာ အဲဒီကတည်းက
မော်ဒန်ကဗျာ ဖြစ်နေပြီလား။

မော်ဒန်ကဗျာ လုံးဝမဟုတ်သေးပါဘူး။

ဖော်ဝေး၊ မောင်ချောနွယ်တို့ ပါဝင်ရေးသားခဲ့တဲ့
‘’သစ်ရွက်အသေများပေါ်မှ ရက်စက်သောဂီတ’’
ကဗျာစာအုပ်ဟာ အေဒီသက္ကရာဇ် ဘယ်နှခုနှစ်က
ထွက်ရှိခဲ့ပါသလဲ။

၁၉၇၃-၇၄ ခုနှစ်လောက်ကလိုိ့ ယူဆပါတယ်။

၁၉၇၀-ခုနှစ်လောက်က ထွက်ရှိခဲ့တဲ့ ပြည်အောင်ဇော်
မိုးရဲ့ ‘’ကျစ်ဆံမြှီးရှည်ရှည်’’ကဗျာစာအုပ်နဲ့ ၁၉၇၂-
ခုနှစ်မှာ ထွက်ရှိခဲ့တဲ့ သုခမိလှိုင်ရဲ့ ‘’ဇွန်လ၏မိုးရေ
များ’’ကဗျာစာအုပ်တွေဟာ ကာရန်စနစ်ကိုတော့
ပြတ်သားစွာ တော်လှန်ထားတာ တွေ့ရတယ်။
အဲဒီကဗျာစာအုပ်တွေကို မော်ဒန်ကဗျာတွေပါလို့
ပြောလို့ရမလား။

မော်ဒန်သက်နုသေးပေမယ့် မော်ဒန်လို့ လုံးဝပြောလို့
ရပါတယ်။ ထောက်လည်း ထောက်ခံပါတယ်။

၁၉၇၃-ခုနှစ်၊ မတ်လမှာ ထွက်ရှိခဲ့တဲ့ မောင်ချစ်ငွေ
(မောင်ဇေတု)ရဲ့ ခေတ်ပေါ်ကဗျာဟာ မော်ဒန်ကဗျာ
လက္ခဏာနဲ့ ပိုတူလာတယ်ဆိုတာ ဟုတ်ပါရဲ့လား။

ဟုတ်ပါတယ်။ အဲဒီကဗျာစာအုပ်ကို ဖတ်ဖူးပါတယ်။
အဲဒီတုန်းက သူ ရေးခဲ့တဲ့ ‘’ကက်ဆက်ထဲက ဆိုရှယ်
လစ်စကား၊ ငါ သူ့ကို လက်ဆောင်မပေးဘူး၊ ဘရာစီ
ယာမှာ ရေမြှုပ်တွေအပြည့်နဲ့ ငါ သူ့ကို လက်ဆောင်
မပေးဘူး’’ဆိုတာတွေလေ။ ဒါပေမဲ့ ခေတ်ပေါ်ကဗျာ
မှာ ဘယ်သူက စောတယ်၊ ဘယ်သူက နောက်ကျ
တယ်လို့က အရေးမကြီးပါဘူး။ အရေးကြီးတာက
တန်ဖိုးကြီးတဲ့ကဗျာအဖြစ် ရောက်ရေး၊ မရောက်
ရေးက အရေးကြီးပါတယ်။

ဒါဆိုရင် ၁၉၆၉-ခုနှစ်က ထွက်ရှိခဲ့တဲ့ မောင်သာနိုး
(ခေါ်) မောင်သိင်္ဂါရဲ့ ‘’မလင်းပြာ’’ကဗျာကို ဖတ်ဖူး
သလား။ အဲဒီကဗျာကိုကော မော်ဒန်ရဲ့အစလို့
လက်ခံနိုင်သလား။

လက်ခံပါတယ်။ အဲဒီကဗျာနဲ့ မော်ဒန်စတယ်လို့တော့
မယူဆပါဘူး။ အဲဒီကဗျာဟာ ၁၉၆၉-ခုနှစ်က
ထွက်ရှိခဲ့တဲ့ ‘’ဒေါင်းအိုးတဝေဝေ’’ကဗျာစာအုပ်မှာ
ပါခဲ့တာမဟုတ်လား။

ဟုတ်ပါတယ်။ အဲဒီကဗျာစာအုပ်ဟာ ကျွန်တော်
ကျောင်းသားဘဝတုန်းက သူငယ်ချင်းအောင်သန်းနဲ့
ရွှေဆွဲကြိုးတစ်ကုံးစီ ရောင်းချပြီး ထုတ်ခဲ့ကြတဲ့
စာအုပ်ပါ။

ဒါဆိုရင် ကိုလှကျော်နေက ကဗျာကို
တော်တော်ချစ်တာပဲ။

အဲဒီဒေါင်းအိုးတဝေဝေကဗျာစာအုပ်မှာ မျက်နှာဖုံး
ကိုယ်တိုင်ပန်းချီရေးခဲ့ပါတယ်။ ကဗျာသုံးပုဒ်လည်း
ပါဝင်ရေးခဲ့ပါတယ်။

ဟုတ်ပြီ။ ဒါဆိုရင် စာကဗျာကို ကိုလှကျော်နေ
ဘယ်လောက်ချစ်တယ်ဆိုတာ ယုံသွားပြီ။ ဆက်ပြော။

အဲဒီတုန်းက မောင်ချောနွယ်တို့သုံးယောက်ထုတ်တဲ့
‘’သစ်ရွက်အသေများပေါ်က ရက်စက်သောဂီတ’’
ကဗျာစာအုပ်ဟာ မောင်သာနိုးရဲ့‘’ထင်းရှူးပင်ရိပ်’’
သြဇာ သက်ရောက်မှုရှိနေပြီလား။

နည်းနည်းတော့ရှိနေပါပြီ။ လုံးဝလောင်းရိပ်နဲ့ ရှင်သန်
ခဲ့တာတော့ မဟုတ်ပါဘူး။ ဘာကြောင့်လဲဆိုတော့
ထင်ရှူးပင်ရိပ်မရှိခင်ကတည်းက ဒေါက်တာမောင်ဖြူး
ရှိနေတယ်။ ဒဂုန်တာရာ ရှိနေတယ်။ ကြည်အေး
ရှိနေတယ်လေ။

ဒေါက်တာမောင်ဖြူး၊ ဒဂုန်တာရာနဲ့ ကြည်အေးတို့
ဆီက မောင်ချောနွယ် ဘာတွေရခဲ့သလဲ။

ဒေါက်တာမောင်ဖြူးက ကျွန်တော့်ကို ကမ္ဘာကြီးနဲ့
ဆက်သွယ်ပေးခဲ့ပါတယ်။ ဒဂုန်တာရာက ကျွန်တော့်
ကို တဟီဟီလို အသစ်မျိုးပေးခဲ့တယ်။ ကြည်အေးက
တော့ ခံစားမှုဆိုတာဘာလဲလို့ သိအောင်လုပ်ပေးခဲ့
ဖူးတယ်။

ခေတ်ပေါ်ကဗျာနဲ့ပတ်သက်ပြီး အတတ်ပညာတွေကို
တော့ မောင်သာနိုးရဲ့ ‘’ထင်းရှူးပင်ရိပ်’’ ၊ ဂျော့သွန်
မဆင်ရဲ့ ‘’မာက္ခစ်ဝါဒနဲ့ ကဗျာ’’ ၊ ကဗျာဆရာမြဇင်ရဲ့
‘’မြန်မာခေတ်ပေါ်ကဗျာစာတမ်း (ခေတ်ပေါ်နရီနှင့်
နိမိတ်ပုံ)’’ ၊ တင်မောင်အေး ဘာသာပြန်တဲ့ ဘား
တော့ဘရက်ရဲ့ ‘’အနာဂတ်အတွက် ကဗျာ’’ စာအုပ်
တွေဟာ မောင်ချောနွယ်အတွက် ဘယ်လောက်သင်
ကြားပေးမှုရှိခဲ့သလဲ။

ဟုတ်ကဲ့။ သင်ကြားပေးတယ်ဆိုတာထက် အဲဒီစာ
အုပ်တွေဟာ ကျွန်တော့်ကို သတင်းပေးခဲ့ပါတယ်။
အချိုးအစားနဲ့ပြောရရင် သုံးပုံတစ်ပုံ၊ သုံးချိုးတစ်ချိုး
လောက်တော့ သတင်းပေးခဲ့ပါတယ်။

ဟို ၁၉၆၈-ခုနှစ်က ဆရာကြီး မင်းသုဝဏ်အိမ်မှာ
ကျင်းပခဲ့တဲ့ ကဗျာအလုပ်စခန်း၊ ကဗျာဝပ်ရှော့တစ်ခု
မှာ မောင်သာနိုးတို့၊ ဆရာမြဇင်တို့က နိုင်ငံတကာ
ကဗျာတွေအကြောင်း ဆွေးနွေးကြရင်း ‘’ထင်းရှူးပင်
ရိပ်’’ နဲ့ ‘’မြန်မာခေတ်ပေါ်ကဗျာစာတမ်း (ခေတ်ပေါ်
နရီနှင့် နိမိတ်ပုံ)’’ စာအုပ်တွေ ထွက်ရှိခဲ့တယ်လို့
သိရတယ်။ အဲဒီကဗျာဝပ်ရှော့ကို မောင်ချောနွယ်
တက်ရောက်ဖြစ်ခဲ့သလား။

မတက်ဖြစ်ခဲ့ပါဘူးခင်ဗျာ။ ဘာကြောင့်လဲဆိုတော့
အဲဒီကာလက နယ်ရောက်နေတဲ့အတွက်လို့ ပြောချင်
ပါတယ်။

၁၉၇၀-ခုနှစ်လောက်က ထွန်းကားခဲ့တဲ့
ဇင်နိုးကြူးဝါဒကို လက်ခံသလား။

လက်မခံဘူး။ မထောက်ခံဘူး။ သဘောမတူဘူး။

ဘာ့ကြောင့် သဘောမတူတာပါလိမ့်။

ဂိုဏ်းထောင်တယ်ထင်လို့ သဘောမတူတာပါ။

ဂိုဏ်းဆိုရင် ဂုဏ်ယုန်ဂိုဏ်း၊ တော်လှစာပေဂိုဏ်း၊
(မင်းကျော်၊ နတ်နွယ်၊ မောင်နေဝင်း၊ နေနတ်နွယ်
ဂိုဏ်း) အစရှိသည်တို့အားလုံးကို မောင်ချောနွယ်က
သိပ်မုန်းတယ်ပေါ့၊ ဟုတ်လား။

ဟုတ်ပါတယ်။ ဂိုဏ်းဖွဲ့တာကို ကျွန်တော် လုံးဝလက်
မခံပါဘူး။ ကျွန်တော်ကတော့ သင်းကွဲတစ်ကောင်ပါပဲ။

မောင်ချောနွယ်နောက်က လူငယ်အင်အားကြောင့်
မောင်ချောနွယ်ဂိုဏ်းဖြစ်လာခဲ့ရင်ကော…။

အဖြစ်မခံပါဘူး။ ဆရာကြီးရာထူးကိုလည်း မက်မော
စိတ်မရှိပါဘူး။ ပုဂ္ဂိုလ်တည်ထောင်ဖို့ထက် တရား
တွေပဲ တည်ဆောက်သွားချင်ပါတယ်။

၁၉၇၀-ခုနှစ်ဝန်းကျင်က ထူထောင်နိုင်ခဲ့တဲ့ မိုးဝေ
ကဗျာခေတ်ဆိုတာ ရှိခဲ့ပါသလား။ မိုးဝေကဗျာခေတ်
ရှိ/မရှိဆိုတာ ဆွေးနွေးပေးပါ။

မိုးဝေကဗျာခေတ်ဆိုတာ အသေအချာကို ရှိခဲ့တာ
ပေါ့ဗျာ။ မိုးဝေမှာ စုစည်းခဲ့တဲ့ ကဗျာလူငယ်တွေက
နည်းတာမှ မဟုတ်ဘဲ။ လူငယ်တွေထူထောင်ရင်
ခေတ်တစ်ခေတ်ဖြစ်တယ်ဆိုတာ လက်ခံတယ်
မဟုတ်လား။

ဟုတ်ကဲ့။ မောင်ချောနွယ်အနေနဲ့ မိုးဝေမဂ္ဂဇင်းမှာ
ဘယ်နှပုဒ်လောက် ရေးဖြစ်ပါသလဲ။

သုံးလေးပုဒ်ခန့်ရှိမှာပါ။

ဘာကဗျာလေးတွေပါလိမ့်။

(၁) ဘတ်စ်မှတ်တိုင်၊ (၂) ရွှေ၊ (၃) မာနနဲ့ ငါ၊ စတဲ့
ကဗျာလေးတွေ ဖြစ်ပါတယ်။

ဒဂုန်တာရာရဲ့ စာပေသစ်သဘောတရားများနဲ့
စာပေလှုပ်ရှားမှုများဟာ ခေတ်ပေါ်ကဗျာကို
ထောက်ကူမှုပေးခဲ့ပါသလား။

သိပ်မပြုနိုင်ဘူးလို့ ပြောချင်ပါတယ်။

မောင်ချောနွယ်ကို တချို့က ဒဂုန်တာရာ ဆန့်ကျင်
ရေးသမားလို့ မြင်ကြတယ်။ အဲဒါ ဘယ်လိုပြောမလဲ။

လုံးဝမဆန့်ကျင်ပါဘူး။ ရိုသေပါတယ်။ ကြီးသူကို
ရိုသေ၊ ရွယ်တူကို လေးစား၊ ငယ်သူကို တန်ဖိုးထား
ဆိုတဲ့စကားလည်း ရှိတယ်မဟုတ်လား။

အောင်ဘညိုက ခေတ်ပေါ်ကဗျာကို လက်မခံရင်
ကျည်ဆံရထားအကြိတ်ဝါးခံသွားရနိုင်တယ်ဆိုတာ
ဟုတ်နိုင်သလား။

အောင်ဘညိုအယူအဆမို့ ဒီစကားဟာ အောင်ဘညို
နဲ့ပဲ သက်ဆိုင်ပါတယ်။ ဒီတစ်ချက်တည်းနဲ့တော့
ပြောလို့မရပါဘူး။ နောင် အောင်ဘညိုနဲ့တွေ့ရင်
ပြောစရာစကားလေးတွေ ပြောပြလိုက်ပါဦးမယ်။

ယနေ့ မော်ဒန်ကဗျာရဲ့သက်တမ်းဟာ ဆယ်စုနှစ်
နှစ်ခုစွန်းခဲ့ပါလျက် ဝါကျပျက်၊ လင်္ကာပျက်၊ နားလည်
ရခက်တာ မော်ဒန်ကဗျာပါလို့ ရင့်ရင့်သီးသီး စွပ်စွဲ
တိုက်ခိုက်နေကြတဲ့ ဂန္ထဝင်ခေတ်စမ်း၊ ဥခွံဟောင်း
ထဲက ကဗျာသမား၊ စာသမားအုပ်စုကို ဘယ်လို
သဘောထားမလဲ။

ဘယ်လိုမှ သဘောမထားပါဘူး။ ကျေးဇူးတင်တယ်
ရယ်လို့ပဲ သဘောထားပါတယ်။

ဘာကြောင့် သူတို့ကို ကျေးဇူးတင်မိတာလဲ။

သူတို့ ဒီလိုပြောကြတဲ့အတွက် တစ်အချက်က
ကျွန်တော်တို့ကို ရာထူးမြှင့်ပေးရာကျလို့ ကျေးဇူးတင်
တယ်ဗျာ။ နှစ်အချက်က သူတို့မသိတာကို ကျုပ်တို့
သိနေတယ်လို့ ဝန်ခံလိုက်တဲ့အတွက် ကျေးဇူးတင်
တယ်ဗျာ။

မောင်ချောနွယ်တို့က သူတို့ထက် ဘာတွေ
ပိုသိနေလို့ပါလိမ့်။

ထင်းရှူးပင်ရိပ်မှာပါတဲ့ ဒီလန်သောမတ်စ်တို့၊ မာလာ
မေတို့ကို သူတို့ မသိကြဘူးလေ။ သူတို့အသံကိုလည်း
မကြားဖူး၊ သူတို့ဟန်ကိုလည်း မမြင်ဖူးကြတာကတော့
သေချာတယ်။

ဘယ်လိုဟန်နဲ့ အသံမျိုးပါလိမ့်။

ဒီလန်သောမတ်စ်ရေးခဲ့တဲ့ ‘’စာချုပ်ကို လက်မှတ်ထိုး
တဲ့လက်ဟာ မြို့ကိုဖျက်တယ်’’ဆိုတဲ့ ကဗျာမျိုးကို
သူတို့ အရသာမခံတတ်ကြဘူး။ မသိကြဘူးထင်ပါ
တယ်။

ခေတ်ပေါ်ကဗျာဆရာ လူငယ်တွေကို ထင်းရှူးပင်ရိပ်
အောက်မှာ အအေးပတ်နေတာတို့၊ ထင်းရှူးပင်က
ခြွေချလိုက်တဲ့ဆူးကြောင့် လူငယ်တွေ ဆူးစူးနေပြီတို့၊
ခေတ်ပေါ်ကဗျာဆိုတာ နိုင်ငံခြားကဗျာတွေကို ဘာ
သာပြန်ရင်း ကာရန်ကိုမရှာနိုင်၊ မရှာအားတာနဲ့ မော်
ဒန်ကဗျာပေါ်လာတယ်ဆိုတဲ့ အဟောင်းကို ဖက်
တွယ်လိုတဲ့အုပ်စုက ဟိုချောင်ဒီချောင်က အသံမျိုးစုံနဲ့
ထအော်နေတာတွေ့ရတယ်။ သူတို့ကို ဘယ် လိုပြန်
ပြောမလဲ။

သနားတယ်လို့ပဲ ပြန်ပြောချင်ပါတယ်။

မော်ဒန်ကဗျာဟာ ကာလကိုမဖော်ပြဘူးဆိုတာ
လက်ခံပါသလား။

လုံးဝလက်မခံပါ။ မော်ဒန်ကဗျာကတော့ ကာလကို
အတိအကျဖော်ပြတယ်လို့ ပြောရဲတယ်ဗျာ။

မော်ဒန်ကဗျာဆိုတာ အာရုံသစ်ဖောက်ထွက်စီးမျော
ခြင်းလို့ အဓိပ္ပါယ်ဖွင့်ဆိုကြတဲ့အပေါ် ဘယ်လိုချေပ
မလဲ။

ကျွန်တော် အဓိပ္ပါယ်ဖွင့်ဆိုချင်တဲ့ မော်ဒန်ကဗျာဟာ
ဖောက်ထွက်ခြင်းပဲ။

ဘယ်လိုဖောက်ထွက်ခြင်းမျိုးပါလိမ့်။

မော်ဒန်ကဗျာဟာ လောကကိုလည်း ဖောက်ထွင်း
တယ်ဗျာ။ ကမ္ဘာကြီးကိုလည်း ဖောက်ထွင်းတယ်။
ဂြိုဟ်တွေကိုလည်း ဖောက်ထွင်းတယ်။ နံရံတွေ
အားလုံးကိုလည်း ဖောက်ထွင်းတယ်။ ကျောက်မျက်
ရတနာအားလုံးကိုလည်း ဖောက်ထွင်းတယ်။ အရာ
ဝတ္ထုအားလုံးကို ဖောက်ထွင်းသိမြင်ပြီး တည်ဆောက်
ထားတဲ့အရာလို့ပဲ အဓိပ္ပါယ်ဖွင့်ဆိုချင်ပါတယ်။

ဒါဆိုရင် မော်ဒန်ကဗျာဆရာဆိုတာ
ဖောက်ထွင်းဝိဇ္ဇာတွေပေါ့နော်။

မှန်ပါ့ဗျာ။ ဖောက်ထွင်းဝိဇ္ဇာအစစ်တွေပါပဲ။

မောင်ချောနွယ်အနေနဲ့က ‘’ဆတ်သွား’’ ၊ ‘’သစ္စာပန်း
တွေနဲ့ မေလ’’ ၊ ‘’နတ်တိုိ့ခိုးဝှက်ခြင်းခံရတဲ့ကဗျာ’’
တွေကို ကိုယ်တိုင်ရေးခဲ့မိတာမှဟုတ်ရဲ့လားလိုိ့
ဘာကြောင့် ခံစားမိတာလဲ။

ဟုတ်ကဲ့။ အဲဒီကဗျာသုံးပုဒ်အပြင် ‘’မျှော်လင့်ခြင်း
ထမင်းသိုးများ’’ ဆိုတဲ့ကဗျာတစ်ပုဒ်လည်း ပါပါတယ်။
ကိုယ်တိုင်ရေးမိတာမှဟုတ်ရဲ့လားလို့ ခံစားမိတာက
တော့ အဲဒီလောက်ကောင်းတဲ့ကဗျာတွေကို
ကျွန်တော့်လက်က ရေးနိုင်တယ်မထင်မိလို့ပါ။
နှလုံးသွေးကို မင်ဖျော်ပြီးရေးခဲ့မိသလား မသိပါဘူး။

မောင်ချောနွယ်ပြောခဲ့တဲ့ နံရံကြီး ကိုခေါင်းနဲ့တိုက်ပြီးမှ
ကျုပ်တိုိ့ရဲ့ကဗျာခေတ်ကို ထူထောင်ရတယ်ဆိုတာက
ဂန္ထဝင်နဲ့ ခေတ်စမ်းနံရံကြီးတွေကို ခေါင်းနဲ့တိုက်ခဲ့ရ
တယ်လို့ ဆိုလိုတာလား။

လောကရဲ့နံရံအားလုံးကို သွေးခြင်းနီအောင်
ခေါင်းနဲ့တိုက်ခဲ့ရတာပါ။

အလင်းရောင်ကို မြင်ရပြီလား။

ဖြူးဖြောင့်နေတဲ့ လမ်းမကြီးကို တွေ့နေရပါပြီ။

ကိုသင်းခိုင်နဲ့စကားဝိုင်းမှာ ကဗျာဆရာပီသအောင်
ကြိုးစားနေတယ်ဆိုတာက အရက်ဝိုင်းပေါင်း မြောက်
မြားစွာမှာ နေထိုင်ပျော်မွေ့နေခြင်းများနဲ့တော့ မဆိုင်
ပါဘူးနော်။

ကျွန်တော်တို့ဘဝတွေမှာ အရက်ဟာ အဓိကမကျပါ
ဘူး။ ဒါပေမဲ့ အရက်မပါရင်လည်း ကျွန်တော်တို့ဘဝ
မဖြစ်ဘူး။ မြန်မာပြည်အရပ်ရပ်ရဲ့ အရက်ဆိုင်တွေဟာ
ကျွန်တော်တို့ရဲ့ ယဉ်ကျေးမှုကလပ်တွေပါ။

မောင်ချောနွယ်တို့ တိုင်းပြည်ပတ်ပြီးအရက်သောက်
နေတဲ့ကိစ္စဟာ အရက်ဝိုင်းအားလုံးဟာ မောင်ချော
နွယ်တို့အတွက် ကဗျာဝပ်ရှော့တွေဖြစ်နေလို့လား။

လောလောဆယ်တော့ အရက်ဝိုင်းတိုင်းကို ကဗျာ
ဝပ်ရှော့လို့ ပြောလို့မရသေးပါဘူး။ တစ်ဝက်တော့
ပြောလို့ရပါတယ်။

ခေတ်ပေါ်ကဗျာ ထွန်းကားပျံ့နှံ့ရေးအတွက် ဘာတွေ
လိုအပ်သလဲ။

နံပါတ်တစ် ကဗျာဆရာကောင်းတွေ လိုအပ်ပါတယ်။
နံပါတ်နှစ်ကတော့ ခေတ်ပေါ်ပစ္စည်းတွေ လိုအပ်ပါ
တယ်။

ခေတ်ပေါ်ပစ္စည်းဆိုတာ ဘာတွေလဲ။

ရုပ်သံနှစ်ပါးစလုံးကို ပို့ဆောင်ပေးတဲ့အရာအားလုံးကို
ပြောတာပါ။

ခေတ်ပေါ်ကဗျာ ပျံ့နှံ့ရေးအတွက် ကဗျာရွတ်ပွဲတွေ
လိုအပ်ပါသလား။

ကဗျာရွတ်ပွဲတွေ ရှိရမယ်လို့ လက်ခံပါတယ်။

ခေတ်ပေါ်ကဗျာကို ဖတ်ရှုနားလည်နိုင်စွမ်းရှိတဲ့အရေ
အတွက်ဟာ သိပ်နည်းနေသေးတယ်ဆိုတာ လက်ခံ
ပါသလား။

လက်ခံပါတယ်။ ဒါပေမယ့် နားလည်နိုင်စွမ်းနဲ့ ဖတ်ရှု
ခံစားနေတဲ့ပရိတ်သတ်ကတော့ အမြုတေတွေဆိုတာ
ငြင်းလို့မရပါဘူး။

ခေတ်ပေါ်ကဗျာကို ဖတ်ရှုခံစားနိုင်ဖို့ အခြေခံပညာ
ဘယ်အတိုင်းအတာအထိ လိုအပ်ပါသလဲ။

ခေတ်ပေါ်ကဗျာကို ဖတ်ရှုခံစားနိုင်ဖို့ဆိုတာ အခြေခံ
ပညာမလိုအပ်ပါဘူး။ ကဗျာကို မြတ်နိုးတတ်တဲ့စိတ်
ရှိဖို့ပဲလိုအပ်ပါတယ်။ အဓိကက ခေတ်ပေါ်ကဗျာကို
ခံစားနိုင်ဖို့အတွက် (I.Q)မြင့်ဖို့တော့ လိုအပ်ပါလိမ့်
မယ်။

ခေတ်ပေါ်ကဗျာ၊ မော်ဒန်ကဗျာဆိုတာကတော့
အတူတူပဲပေါ့နော်။ မော်ဒန်ကဗျာကနေ ပို့စ်မော်ဒန်ကို
ဘယ်တော့လောက် ကူးပြောင်းမယ်လို့ယူဆပါသလဲ။

ခေါင်းစီးတွေ၊ ဆိုင်းဘုတ်တွေက အရေးမကြီးပါဘူး။
မော်ဒန်ဆိုတာက သစ်ဖို့တော့လိုပါတယ်။ အသစ်ကို
ရေးရင်း ပို့စ်မော်ဒန်ဖြစ်ကောင်း ဖြစ်သွားနိုင်ပါတယ်။
ရေးရင်းဖြစ်သွားတာ မတတ်နိုင်ဘူး။ ကဗျာဖန်တီး
ရှင်ဟာ ဝိဂြိုဟ်ပြုပြီး မတည်ဆောက်တတ်ပါဘူး။
ဒါက သုတေသီတွေလုပ်ရမယ့် အလုပ်ပါ။ အက်စစ်
ကန်ထဲထည့်ထည့်၊ ရေကန်ထဲထည့်ထည့်၊ ဘယ်ကန်
ထဲထည့်ထည့် အရည်ပျော်မသွားဖို့က အရေးကြီးပါ
တယ်။ ကဗျာဟာ အကန့်တစ်ကန့်ထဲမှာ မရှိသင့်ပါ
ဘူး။

ခေတ်ပေါ်ကဗျာမှာ ဘောင်မရှိရဘူးဆိုတဲ့
အယူအဆကို လက်ခံတာပေါ့နော်။

ဟုတ်ကဲ့။ “ဘောင်”ကို ကျွန်တော် မုန်းပါတယ်။
ဘောင်ဆိုတာ မရှိအပ်ပါဘူး။

“ဘောင်”မရှိရင် မင်းမဲ့ဖြစ်သွားနိုင်တယ်လို့ ဒဂုန်တာ
ရာပြောတဲ့စကားကို မောင်သင်းခိုင်က မင်းမဲ့တော့
မဟုတ်ပါဘူး၊ ဆရာပြောရင်လည်း ပြုံးပြုံးလေးခံယူဖို့
အသင့်ပါပဲဆိုတဲ့စကားကို လက်ခံသလား။

ဘောင်ကိုလက်မခံတာနဲ့ မင်းမဲ့ဖြစ်ရမယ်ဆိုတဲ့အယူ
အဆကို ကျွန်တော် လက်မခံပါဘူး။ ကျွန်တော်ဟာ
မင်းမဲ့မဟုတ်ပါဘူး။

ခေတ်ပေါ်ကဗျာသမိုင်းကို လေ့လာလိုက်တော့
၁၉၆၈-ခုနှစ်၊ ဆရာကြီးမင်းသုဝဏ်ရဲ့အိမ်မှာ ကျင်းပ
တဲ့ ကဗျာအလုပ်စခန်းက စခဲ့တယ်လို့ တွေ့ရှိရပေမယ့်
ဆရာကြီးမင်းသုဝဏ်ကိုယ်တိုင်က ဒီနေ့ကဗျာတွေကို
နားမလည်ဘူးလို့ ပြောတဲ့စကားဟာ ဟုတ်နိုင်ပါသ
လား။

ဆရာကြီးမင်းသုဝဏ်ဟာ ကဗျာဆရာပဲဗျာ။ နားမ
လည်နိုင်စရာအကြောင်းမရှိပါဘူး။ အဲဒီစကားပြောခဲ့
ရင်လည်း ဆရာကြီးဟာ မြန်မာပြည်မှာနေပြီး မြန်မာ
သိပ်ဆန်လွန်းလို့ နေမှာပါ။

မောင်ချောနွယ်ဟာ မြန်မာသိပ်ဆန်တာကို
သိပ်မုန်းသလား။

သိပ်အရိုသေခံချင်တာနဲ့၊ သိပ်အားနာတတ်တဲ့ မြန်မာ့
စရိုက်တွေကိုတော့ မကြိုက်တာအမှန်ပါပဲဗျာ။

ဘဝမှာ လေးငါးခြောက်ခု မလိုပါဘူး၊ နှစ်ခုပဲ၊ ချစ်သူ
စစ်စစ်၊ ရန်သူစစ်စစ်၊ ဒီနှစ်ခုပဲဆိုတဲ့ မောင်ချောနွယ်၊
ရန်သူစစ်စစ်နဲ့ ချစ်သူစစ်စစ်ကို ရှာလို့တွေ့ပြီလား။

တကယ်ကို တွေ့နေပါပြီဗျာ။

ချစ်သူစစ်စစ်နဲ့ ရန်သူစစ်စစ်ဆိုတာ ဘယ်သူတွေလဲ။

မျက်မှောက်ခေတ်ဟာ ကျွန်တော့်ရ့ချစ်သူစစ်စစ်ဖြစ်
သလို၊ ကျွန်တော့်ရဲ့ရန်သူစစ်စစ်လည်းဖြစ်ပါတယ်။

ဆရာမောင်သာနိုးက ခေတ်ပေါ်ကဗျာမှာ ချောက်ကမ်း
ပါးကြီး သုံးခုရှိတယ်။ အဲဒါတွေကတော့ လျှို့ဝှက်
နက်နဲလွန်းခြင်းချောက်ကမ်းပါး၊ စကားပြေဆန်လွန်း
ခြင်းချောက်ကမ်းပါး၊ လွယ်လွန်းခြင်းချောက်ကမ်းပါး
ဆိုတဲ့ အချက်တွေကို လက်ခံပါသလား။

မောင်သာနိုးကို စတုတ္ထမြောက်ချောက်ကမ်းပါးကြီး
ရှိသေးတယ်ဆိုတာ ဖြည့်စွက်ပြောဆိုချင်ပါသေးတယ်။

အဲဒီ ချောက်ကမ်းပါးက…။

ဝါစနာလင်္ကာရ များခြင်းပါ။

မြန်မာလိုက…။

အလင်္ကာများခြင်းဆိုရင် အားလုံးသဘောပေါက်
ကြမယ်နဲ့ တူပါတယ်။

ခု မဂ္ဂဇင်းတွေမှာ ခေတ်ပေါ်ကဗျာရဲ့နည်းပရိယာယ်
တွေကို ရေးသားနေကြတဲ့ ဆရာသစ္စာနီ၊ ဆရာဇော်
ဇော်အောင်နဲ့ ဆရာမျိုးသန့်တိုိ့ကို ဘယ်လိုမြင်ပါသလဲ။

လူတော်တွေလို့မြင်ပါတယ်။ တစ်ဦးချင်းခွဲပြောရမယ်
ဆိုရင် သစ္စာနီနဲ့ ဆရာဇော်ဇော်အောင်တို့ဟာ နည်း
စနစ်ကို သိမြင်ကြပါတယ်။ ဆရာမျိုးသန့်ကတော့
နည်းစနစ်ထက် သူ့ရဲ့ခံစားမှုကို ပိုဇောင်းပေး ရေးနေ
တာ တွေ့ရပါတယ်။ ကျွန်တော်ကတော့ သူတို့လောက်
ခေတ်ပေါ်ကဗျာရဲ့နည်းစနစ်ကို မသိရိုးအမှန်ပါပဲ။

ခေတ်ပေါ်ကဗျာကို နည်းစနစ်မသိဘဲရေးရင် ကဗျာ
ကောင်းထွက်မလာနိုင်ဘူးလို့ ဆိုလိုတာလား။

နည်းစနစ်မသိဘဲ ခေတ်ပေါ်ကဗျာရေးနိုင်တယ်၊ မရေး
နိုင်ဘူးလို့ ကျွန်တော် ဝင်ရောက်ကောက်ချက် မချလို
ပါဘူး။ ကျွန်တော်ကတော့ နည်းစနစ်တွေကိုမသိဘဲ
ကဗျာရေးနေတာ မဟုတ်ဘူးလို့တော့ ပြောချင်ပါ
တယ်။ ခေတ်ပေါ်ကဗျာရေးနိုင်ဖို့အတွက် နည်းစနစ်
လိုတယ်၊ မလိုဘူးဆိုတာတော့ ကိုယ်တိုင်တွေးခေါ်
ယူဆကြည့်ကြပါ။

ခေတ်ပေါ်ကဗျာရေးနိုင်ဖို့အတွက် ပုသဏ္ဍာန်သစ်၊
အကြောင်းအရာသစ်၊ အတွေးသစ်တွေ လိုအပ်တယ်
ဆိုတာ ဟုတ်ရဲ့လား။

ဆရာကြီးမင်းသုဝဏ်ရဲ့ “ခါနွေဆန်းတော့ လွမ်းမိ
တယ်”ဆိုတဲ့ကဗျာဟာ အဟောင်းဆိုတာတော့
လက်ခံကြဖို့ လိုအပ်မယ်တော့ထင်ပါတယ်။

တချို့က ရစ်သမ်ဆိုတာ အီသာလိုပဲ တကယ်ရှိတဲ့
အရာမဟုတ်ဘူး၊ ခေတ်ပေါ်ကဗျာသမားတွေဟာ
ကာရန်ကိုတော်လှန်ချင်တာနဲ့ ရစ်သမ်ကို သရဲတစ္ဆေ
လိုမွေးခဲ့ကြတာ၊ တကယ်တော့ ရစ်သမ်ဆိုတာ
ဘာသာပြန်လို့လည်း မရဘူး၊ ရှိလည်းမရှိဘူးဆိုတဲ့
အယူအဆကို လက်ခံပါသလား။

လုံးဝလက်မခံနိုင်ပါ။ ရစ်သမ်ဆိုတာ တကယ်ကိုရှိနေ
တာ အမှန်ပါပဲခင်ဗျာ။

ဟုတ်ကဲ့။ မောင်သင်းခိုင်က မောင်ချောနွယ်ကို
ရစ်သမ်အားကောင်းတယ်လို့ ထောက်ပြဖူးပါတယ်။
ရစ်သမ်ဆိုတာ ဘယ်လိုဟာမျိုးလဲဆိုတာ ရှင်းပြပါ။

ရစ်သမ်ဆိုတာက လူတစ်ယောက် လမ်းလျှောက်လာ
တယ်။ ကြမ်းပြင်ဟာ ရစ်သမ်ပါပဲ။ ကမ္ဘာမြေကြီးဟာ
ရစ်သမ်ပါပဲ။ လေထုရှိတဲ့ကမ္ဘာကြီးမှာ အသက်ရှူသံ
ဟာ ရစ်သမ်ပါပဲလို့ မောင်သာနိုးက ပြောခဲ့သလို
ကမ္ဘာကြီးရှိနေရင် ရစ်သမ်ဆိုတာ ရှိနေမှာအမှန်ပါပဲ
ခင်ဗျာ။

မောင်သင်းခိုင်တို့၊ မောင်ချောနွယ်တို့ကို ကဗျာဆရာ
လူမိုက်ကြီးတွေလို့ တချို့တချို့သောပုဂ္ဂိုလ်တွေက
လက်ညှိုးထိုးကြတယ်။ အဲဒီအပေါ် ဘယ်လိုများခံစား
မိပါသလဲ။

ပြောကြမှာသိနေတဲ့အတွက် လုံးဝမခံစားရပါဘူး။

MAGIC နဲ့ TECHNIQUE ကင်းလို့ရသလား။

အရာအားလုံးဟာ ကင်းလို့မရပါဘူး။ အနုပညာပစ္စည်း
တိုင်းဟာ ခံစားမှုနဲ့ နည်းပညာတွေကို ဖွဲ့စည်းတည်
ဆောက်ထားတဲ့အရာတွေပါ။

ဆွေးနွေးပွဲကို အဆုံးသတ်ကြရအောင်။ ကဗျာကို
ဘယ်လိုခံယူချက်နဲ့ ဖက်တွယ်နေတယ်ဆိုတာ
စာဖတ်ပရိတ်သတ်ကို လက်ဆောင်ပါးပေးခဲ့ပါဦး။

ခေတ်ကို အနုပညာမြောက်သောနည်းသစ်များစွာနဲ့
အမှန်တရားကို ချဉ်းကပ်ခြင်းနဲ့အတူ ကဗျာကို လုံးဝ
ဖက်တွယ်ထားတယ်လို့ ပြောချင်ပါတယ်။ အမှန်တရား
ကို လက်ခံနိုင်ကြပါစေ။

ဟုတ်ကဲ့။ အမှန်တရားထွန်းကားပါစေ။ ဒီနေ့ကဗျာ
ဆရာတစ်ယောက်ဘဝမှာ “မုဆိုးဆိုင်သင်”ဆိုတဲ့
အယူအဆက လိုအပ်ပါသလား။

ကဗျာဆရာရဲ့ခရီးမှာ “မုဆိုးစိုင်သင်”ကိစ္စဟာ လိုအပ်
တာအမှန်ပါပဲ။ ဒီနေ့တော့ မုဆိုးစိုင်သင်ဟာ လုံးဝမလို
အပ်တော့ဘူးလို့ ယူဆပါတယ်။

ခေတ်စမ်းကဗျာခေတ်နဲ့ မော်ဒန်ကဗျာခေတ်ကြားမှာ
တခြားကဗျာခေတ်တစ်ခေတ် ရှိသေးလား။

ခေတ်စမ်းပြီးရင်တော့ ခေတ်ပေါ် (ခေါ်) မော်ဒန်ပါပဲ
ဗျာ။ ကျွန်တော့်အမြင်ပြောရရင်တော့ ခေတ်စမ်းပြီးရင်
ခေတ်ပေါ်။

ခေတ်စမ်းနဲ့တာရာကြား လမ်းသလားခဲ့တယ်ဆိုတဲ့
စကားတွေ ကြားဖူးသလားလို့၊ ခေတ်စမ်းပြီးတော့
တာရာခေတ်ဆိုတာ မရှိခဲ့ဘူးလား။

အဲဒါကတော့ ပြောသူတွေနဲ့ဆိုင်လိမ့်မယ်ဗျ။
ကျွန်တော်နဲ့တော့ သိပ်မဆိုင်ဘူး။ ကျွန်တော့်မှတ်
ချက်ကတော့ ခေတ်စမ်းပြီး ခေတ်ပေါ်ပါပဲ။ ဒါပေမဲ့
ကြားထဲမှာ အနှစ်နှစ်ဆယ်လောက်တော့ ခြားခဲ့တယ်
ဗျ။ အချိန်ကာလ လစ်လပ်မှုပေါ့ဗျာ။

တော်လှန်ကဗျာခေတ်နဲ့ မိုးဝေကဗျာခေတ်တို့ဟာ
ခေတ်စမ်းနဲ့ ဘယ်လောက်ဆွေမျိုးတော်စပ်မှုရှိသလဲ။

ဆွေမျိုးတော်စပ်မှုရှိတာပေါ့ဗျာ။ ဘာလို့လဲဆိုတော့
ကျွန်တော်တို့ဟာ တော်လှန်ကဗျာခေတ်နဲ့ မိုးဝေ
ကဗျာခေတ်မှာ လေးလုံးစပ်က ရုန်းမထွက်နိုင်ကြ
သေးဘူး။ ကျွန်တော်တို့ရဲ့ ကြိုးစားရုန်းကန်နေတဲ့
ကာလအပိုင်းအခြားဆိုပါတော့။ အဲဒီမှာ ကျွန်တော်
ပြောချင်တာက ကမ္ဘာ့စာပေရဲ့သက်ရောက်မှု၊ ဥပမာ
ဗျာ ဝန်ကြီးပဒေသရာဇာရဲ့ သက်ရောက်မှု၊ ရာမရကန်
ဦးတိုးရဲ့ သက်ရောက်မှု၊ ရှင်မဟာရဋ္ဌသာရရဲ့ ဘုံခန်း
ကိုလည်း စမ်းရမယ်၊ သူဇာကိုလည်း ဖတ်ရမယ်ဆိုတဲ့
ကာလဆိုတော့ ခေတ်စမ်းဆိုပိုဆိုးတာပေါ့။ လုံးလုံး
ကြီးကင်းလွတ်တယ်လို့ မယူဆနိုင်ပါဘူး။ ဆွေမျိုး
တော်စပ်မှု အများကြီးရှိပါတယ်။

မော်ဒန်ကဗျာ ခေတ်ပေါ်ကဗျာအနေနဲ့
ရိုးရာဘယ်လောက်ဆန်လို့ရသလဲ။

မျက်မှောက်ပြုပြောဆိုနေတဲ့ စကားတွေ၊ သွားလာ
ဖြတ်သန်းမှု ဘဝတွေ ရိုးရာဆန်သလောက် ရိုးရာဆန်
လို့ရပါတယ်။ ကိုလှကျော်နေရဲ့မေးခွန်းနဲ့ပတ်သက်ပြီး
တော်တော်ဆိုးဆိုးဝါးဝါး ပြောရမယ်ဆိုရင်တော့ ခေတ်
ပေါ်ကဗျာဆိုတာ ပြည်တွင်းဖြစ်နိုင်ငံခြားအရက်ပါပဲ။
ကျွန်တော်တို့လည်း ချက်ကြည့်တာပါပဲ။ အဲဒါ
ကျွန်တော် အရဲရင့်ဆုံးဖြေကြားလိုက်တာပါပဲ။

ကဗျာတစ်ပုဒ်မှာ နဘေတွေ ထုံမွမ်းထားခဲ့လျှင်
ခေတ်ပေါ်ကဗျာဖြစ်လာနိုင်သေးလား။

အဲဒါတော့ သိပ်မဖြစ်နိုင်ဘူးဗျ။ နဘေဆိုတာ ဇာတ်
ဆိုင်းဆင့်တိုိ့ ဘာတို့မှာပဲ သုံးလို့ရတယ်။ နဘေဟာ
ကျွန်တော်တို့အတွက် မလိုအပ်တော့ဘူး။ ကျွန်တော်
တို့ ရှောင်ရှားရမယ့်ကိစ္စဟာ အဲဒီနဘေကို မလိုအပ်
လို့လည်း ကျွန်တော်တို့စွန့်ခွါခဲ့ကြတာ ကြာပါပြီ။

ရစ်သမ်ဆိုတဲ့ဝေါဟာရနဲ့ပတ်သက်ပြီး ဒဂုန်တာရာက
“ကာရန်လှိုင်း”လို့ အဓိပ္ပါယ်ဖွင့်ဆိုခဲ့တယ်။ မောင်သာ
နိုးက “နိမ့်မြင့်သံစဉ်”လို့ အမည်တပ်ခဲ့တယ်။ နောက်
ဆုံး ဆရာကြီးတက္ကသိုလ်ဘုန်းနိုင်က “သံနေသံထား”
လို့ အဓိပ္ပါယ် ဖွင့်ဆိုနေတယ်။ ကိုချောနွယ်အနေနဲ့
ရစ်သမ်ကို ဘယ်လိုအဓိပ္ပါယ်ပြန်ချင်ပါသလဲ။ မြန်မာ
မှုပြုသင့်သေးလား။ ဒီအတိုင်းပဲ ထားချင်သလား။

ကျွန်တော် ရစ်သမ်ကို ကျွန်တော့်ဘာသာ မပြန်ချင်
တော့ပါဘူး။ ရစ်သမ်ကို ရစ်သမ်လို့ပဲခေါ်ရတာ အားရှိ
ပါတယ်။ ရေဒီယိုတို့၊ ကားတို့လို မြန်မာပိုင်ဝေါဟာရ
တစ်ခု ဖြစ်သွားပြီလို့ ယူဆလို့ပါ။ ကျွန်တော့်အမြင်ကို
ပြောတာနော်။ အားလုံးသဘောမတူခွင့်ရှိပါတယ်။

သြဇာရှိတဲ့ကဗျာဆရာကြီးတစ်ယောက်ကနေ ခေတ်
ပေါ်ကဗျာကို အနောက်ကဗျာဝါဒ၊ သေရည်တွေနဲ့
မူးယစ်နေပြီး တော်လှန်ရေးအဘိဓမ္မာတွေ မေ့လျော့
နေကြတယ်လို့ ရေးသားသွားတာ ဖတ်ဖူးတယ်။
ဒီအမြင်ကို ကိုချောနွယ် ဘယ်လိုချေပမလဲ။

ကျွန်တော် ချေပချင်တာကတော့ ကျွန်တော်တို့
လောက် မမေ့မလျော့သွားလာဖြတ်သန်းနေကြသူ
တွေဖြစ်တဲ့အတွက် မမေ့မလျော့ပါဘူး။ မစိုးရိမ်ပါနဲ့လို့
ပြောချင်ပါတယ်။ အဆုံးစွန်ပြောချင်တာက ကျွန်တော်
တို့ ကဗျာတွေကို ဖတ်ကြည့်ပါ။ ကျွန်တော်တို့မေ့
လျော့သလား၊ မမေ့လျော့ဘူးလားဆိုတာ အထင်
အရှားတွေ့ရပါလိမ့်မယ်။ ကျွန်တော်တို့ဟာ ကိုယ်တိုင်
ကိုယ်ကျ ဒဏ်ရာအသစ်တွေနဲ့ နေ့တိုင်း နေထိုင်နေ
ကြပါတယ်လို့ ပြောချင်ပါတယ်။

တစ်ဆက်တည်း ခေတ်ပေါ်ကဗျာမှာ အဘိဓမ္မာမဲ့ခြင်း၊
မမဲ့ခြင်းကိစ္စ ဆွေးနွေးကြရအောင်။ ခေတ်ပေါ်ကဗျာ
တွေမှာ အဘိဓမ္မာမဲ့ခွင့်ရှိပါသလား။

အဘိဓမ္မာဆိုတာ ကဗျာမှာ “ပါဝင်ကိန်း”တစ်ခုတော့
ရှိပါတယ်။ ဒါပေမဲ့ ဘာကဗျာအမျိုးအစားမှာဖြစ်ဖြစ်
အဘိဓမ္မာမဲ့ခြင်း၊ မမဲ့ခြင်းဟာ ခေါင်းစဉ်တစ်ခုအနေနဲ့
မလိုအပ်ပါဘူး။ အရေးလည်း သိပ်မကြီးပါဘူး။ အဘိ
ဓမ္မာ ပါကိုပါရမယ်ဆိုတာ ကျွန်တော် လက်မခံနိုင်ဘူး။
ဘာလို့လဲဆိုတော့ ကဗျာဆိုတာ အဘိဓမ္မာ၊ ဖီလိုဆော်
ဖီကြွေးကြော်ပွဲ မဟုတ်ဘူး။ ကဗျာကို နှလုံးသားနဲ့ရေး
စပ်ပွဲလုပ်နေတာ ဖြစ်တယ်။

ဒါဆိုရင် ဘာသာမရှိတာကိုက ဘာသာရှိနေတယ်။
အဘိဓမ္မာမဲ့တာကိုက အဘိဓမ္မာရှိနေတယ်ဆိုတဲ့
အယူအဆကို လက်ခံသလား။

လုံးဝလက်ခံပါတယ်။

နားလည်မှုဆင်ဖိုနီ အထူးလိုအပ်နေပြီလို့ပြောထားတဲ့
မောင်ချောနွယ်ရဲ့အယူအဆအတိုင်း အားလုံး လွတ်
လပ်စွာ သဘောကွဲလွဲခွင့်ရဖို့ “ကတ္တီပါလမ်းခွဲ” ကိစ္စ
ကို မောင်ချောနွယ်နဲ့ ကျွန်တော် ဝင်ရောက်ဆွေးနွေး
ကြရအောင်။

ကျွန်တော်က လောလောဆယ် စောနေသေးတယ်လို့
ထင်တယ်ဗျ။ ကျွန်တော့်ဆန္ဒကတော့ ဇော်(ပျဉ်းမနား)
ရဲ့“ကတ္တီပါလမ်းခွဲ”ကို ဝင်ရောက်မဆွေးနွေးချင်သေး
ဘူး။

မဆွေးနွေးချင်ပေမယ့် စကားလေးနှစ်ခွန်းလောက်
တော့ မေးပါရစေ။

မေးနိုင်ပါတယ်။

ကျွန်တော်တို့ကဗျာဆရာအားလုံးဟာ ဆရာကြီး
သခင်ကိုယ်တော်မှိုင်းနဲ့လမ်းခွဲဖို့ လိုအပ်မှုရှိပါသလား။

ဟာ… လုံးဝမလိုအပ်ပါဘူးခင်ဗျာ။

ဒါဆိုရင် ဆရာကြီးဒဂုန်တာရာနဲ့ကော လူသိရှင်ကြား
စိန်ခေါ်ပြီး လမ်းခွဲဖို့လိုအပ်မှုရှိပါသလား။

ကျွန်တော်တို့ဟာ ဒဂုန်တာရာကို လမ်းခွဲဖို့ စိတ်ခေါ်ဖို့
ကိစ္စထက် ကျွန်တော်တို့သွားရမယ့်ခရီးကို ကျွန်တော်
တို့သိဖို့ အများကြီးလိုအပ်ပါတယ်။ ဒဂုန်တာရာနဲ့
ပတ်သက်ပြီး ကျွန်တော်ရှောင်တာ မဟုတ်ပါဘူး။
ဒီအတိုင်းပဲပြောရမှာမို့ ပြောတာပါ။

ဒါဆိုရင် ကိုချောနွယ်က ဒဂုန်တာရာကိုစိန်ခေါ်ပြီး
လမ်းခွဲဖို့စောနေသေးတယ်၊ မလိုအပ်သေးဘူး
ဆိုပါတော့။

ဟုတ်ပါတယ်။ ကျွန်တော့်အရင် ဒဂုန်တာရာကို
စိန်ခေါ်နေသူတွေ အများကြီးရှိနေတော့ ကျွန်တော့်
အနေနဲ့ စိန်ခေါ်စရာမလိုပါဘူး။ လမ်းခွဲဖို့ကိစ္စကတော့
ကျွန်တော် ခွဲခဲ့ပြီးတာကြာပါပြီ။ လောလောဆယ်တော့
စိန်မခေါ်ချင်ပါဘူးဗျာ။

ခေတ်ပေါ်ကဗျာတွေဟာ တစ်နေ့တခြား အဟုန်ပြင်း
စွာထွန်းကားနေတယ်တဲ့၊ သစ္စာနီပြောသလို ခေတ်
ပေါ်ကဗျာဆရာတွေကလည်း ပေါများနေတယ်လို့
ဆိုထားတယ်။ ဒီတော့ကာ ခေတ်ပေါ်ကဗျာ စစ်စစ်
မှန်မှန်ထွန်းကားတိုးတက်ရေးအတွက် မည်သို့သော
ပုဂ္ဂိုလ်က ပြုပြင်ထိန်းကြောင်းသွားနိုင်တယ်လို့ ယူဆ
ပါသလဲ။

ခေတ်ပေါ်ကဗျာရဲ့ခေါင်းဆောင်မှုကို ပြောတာလား။

ဟုတ်ပါတယ်။ ဇော်(ပျဉ်းမနား)ကတော့ ခေတ်ပေါ်
ကဗျာကို ပြုပြင်ထိန်းကျောင်းသွားမယ့်လူဟာ
မောင်သာနိုးတစ်ယောက်ပဲရှိတယ်လို့ ယူဆတယ်။
မောင်သွေးချွန်ကတော့ မောင်သာနိုးဟာ ခေတ်ပေါ်
ကဗျာရဲ့ခေါင်းဆောင်မဖြစ်နိုင်ဘူး။ ဘာလို့လဲဆိုတော့
မောင်သာနိုးဟာ ဦးတည်ချက်ပီပီသသမရှိဘူး။
အတတ်ပညာနဲ့ ဟန်သက်သက်သမားဖြစ်နေတယ်။
ဒီတော့ မောင်ချောနွယ်အနေနဲ့ ဘယ်သူ့ကောက်
ချက်ကို သဘောတူညီမှုရှိသလဲ။

ကျွန်တော်ကတော့ ခေတ်ပေါ်ကဗျာကို ဦးဆောင်နိုင်
တဲ့ပုဂ္ဂိုလ် မရှိသေးဘူးလို့ပဲ မြင်ပါတယ်။

ဘယ်ကဗျာမျိုးမဆို FORM နဲ့ပတ်သက်ပြီး ဘယ်နိုင်
ငံကမဆို ရနိုင်တယ်။ CONT-ENTS နဲ့ပတ်သက်
ပြီးလို့ကတော့ ဒီနိုင်ငံကပဲရနိုင်တယ်ဆိုတဲ့အယူအဆ
ကို လက်ခံပါသလား။

လက်ခံပါတယ်။ ကနေ့ခေတ်အရ အင်မတန်
အကြောင်းအရာကောင်းတွေ ရှိပါတယ်။ ဒါကြောင့်
လူတစ်ယောက်မှာ ဘောပင်တစ်ချောင်းမပါခဲ့ရင်
ဗာလာနံပဲလို့ သူငယ်ချင်းတွေကြားမှာ ပြောလေ့
ပြောထရှိနေပါတယ်။ တခြားနိုင်ငံထက်သာခြင်း၊
မသာခြင်းကိစ္စတော့ မသိပါဘူး။ ဒါပေမဲ့ ကျွန်တော်တို့
နိုင်ငံ ဒီနေ့ကာလမှာ အလွန်အင်မတန်မှကောင်းတဲ့
အကြောင်းအရာတွေ ရှိနေတာ အမှန်ပါပဲ။

ဟိုက္ကူကဗျာနဲ့ပတ်သက်ပြီး မောင်ချောနွယ်နားလည်
သလောက် ဆွေးနွေးပေးပါ။

ဟိုက္ကူကဗျာဆိုတာ ဆာတိုရီလေးတစ်ခုပါ။ ဈာန်
သဘောပါပဲ။ တစ်ချက်အနေနဲ့ခုတ်လိုက်တာပါ။
ချိတ်ကလေးတစ်ချိတ်အနေနဲ့ ချိတ်လိုက်တာပါ။ သူ့မှာ
ဗြူတီခေါ်တဲ့ အလှအပလေးတွေ ရှိတယ်။ နောက်ပြီး
တော့ စတိုင်ရဲ့မြင့်မားမှုလေး တစ်ချက်ပါတယ်။
ဒါပေမဲ့ ကဗျာတစ်ပုဒ်လို အခက်အလက်တွေ၊ ပင်
စည်တွေတော့ မရှိဘူးပေါ့။ ဒါပေမဲ့ ဟိုက္ကူမှာ လှပတဲ့
ကဗျာဓာတ်ကလေးတွေတော့ ကိန်းအောင်းနေတာ
အမှန်ပါပဲ။

ဒါဆိုရင် ကွယ်လွန်သွားတဲ့ ကဗျာဆရာမောင်လူမှိန်ရဲ့
“စာ ခို ကျီးကန်း ပျံကျသမား၊ တီကောင် လယ်ထွန်
စား” ဆိုတာ ဟိုက္ကူဖြစ်သွားတယ်လို့ တချို့က ညွှန်း
ကြတယ်။ ဟိုက္ကူ ဖြစ်,မဖြစ် ဆွေးနွေးပေးပါ။

စာ ခို ကျီးကန်း ပျံကျသမား၊ တီကောင်လယ်ထွန်
စားဟာ ဟိုက္ကူတချို့တစ်ဝက်ဖြစ်တာတော့ မှန်ပါ
တယ်။ လုံးလုံးလျားလျား မဖြစ်တာကတော့ ဒီကဗျာ
မှာ သိမှုပါနေတယ်။ ဟိုက္ကူမှာ သိမှုပါဝင်မှုမရှိရဘူး။
မောင်လူမှိန်ဟာ ကျွန်တော့်သူငယ်ချင်းပါ။ ဒီကိစ္စဟာ
အရမ်းနူးညံ့ပါတယ်။ ဖျတ်ခနဲကိစ္စဆိုတော့ ရှင်းပြရ
တော်တော်ခက်ပါတယ်။

တချို့သောပုဂ္ဂိုလ်ကြီးတွေက ခေတ်ပေါ်ကဗျာကို
စိတ္တဇစာပေဝါဒထဲ ဆွဲသွင်းနေတယ်လို့ စွပ်စွဲကြတယ်။
ခေတ်ပေါ်ကဗျာမှာ သရုပ်မှန်စာပေဝါဒကိန်းအောင်း
နိုင်ပါသလား။

ခက်တယ်ဗျ ကိုလှကျော်နေရ။ ခင်ဗျား ဒီမေးခွန်းတွေ
မေးတော့ ကျွန်တော် စကားတစ်ခွန်းပြောချင်တယ်။
ခေတ်ပေါ်ကဗျာနဲ့ ပတ်သက်တဲ့သင်တန်းပို့ချရမယ်
ဆိုရင် တစ်ပတ်ကို ဒေါ်လာ ၅၀၀၀/ယူမယ်။ လေးလုံး
စပ်ကဗျာကို ပို့ချရမယ်ဆိုရင် မြန်မာငွေ တစ်ပတ်ကို
၁၀၀၀/ယူမယ်။

ကျွန်တော့်မေးခွန်းကိုတော့ ဖြေပေးပါဦး။

ခေတ်ပေါ်ကဗျာမှာ စိတ်ကူးယဉ်စိတ္တဇ စာပေဝါဒရော၊
သရုပ်မှန်စာပေဝါဒရော ပါဝင်ရောနှောလို့ရတယ်လို့
ဖြေချင်ပါတယ်။

ဘာကြောင့် ခေတ်ပေါ်ကဗျာနဲ့ပတ်သက်ပြီး ဒေါ်လာ
၅၀၀၀/ ယူမယ်လို့ စန်းတင်ရတာလဲ။

ကျွန်တော် ခေတ်ပေါ်ကဗျာနဲ့ပတ်သက်ပြီး ဘာကြောင့်
မောက်မာရသလဲဆိုရင် ခေတ်ပေါ်ကဗျာနဲ့ ပတ်သက်
ပြီး ဒဏ်ခံထားရလို့၊ ဒဏ်ရာတွေ ရှိလွန်းအားကြီးလို့၊
ကျွန်တော် ရင်းထားခဲ့ရတာ များလို့ပါ။

ကျွန်တော် လူပြိန်းတစ်ယောက်အနေနဲ့ ကိုချောနွယ်
ကို ပြောကြည့်ချင်တယ်။ မြန်မာ့ကဗျာ ဖြစ်ပေါ်တိုး
တက်မှုလမ်းကြောင်းဟာ Step by Step၊ လှေ
ကား တစ်ထစ်ပြီးတစ်ထစ်ချင်း မသွားဘဲနဲ့ ခေတ်စမ်း
ခေတ်နဲ့ ခေတ်ပေါ်မှာ ခုန်ကူးသွားလို့ ကဗျာချစ်သူ
တွေ၊ ကဗျာမြတ်နိုးသူတွေ နားမလည်ဘဲ ကျန်ရစ်ကြ
တာလား၊ ဒါကလည်း နိုင်ငံရေး၊ လူမှုရေး၊ စီးပွားရေး
တွေကြောင့် ခါးပြတ်သွားခဲ့လို့ ခေတ်ပေါ်အုပ်စုဟာ
အမီလိုက်ရင်း မျက်ခြည်ပျက်ကျန်ရစ်ကြတာလား
ဆိုတာ ရှင်းပြပါ။

ဒါကတော့ဗျာ၊ ဝုန်းခနဲခုန်ကျော်ပြောင်းလဲမှုဆိုတာ
တော့ မဖြစ်နိုင်ပါဘူး။ ဒါပေမဲ့ တိုင်းပြည်ရဲ့နိုင်ငံရေး၊
စီးပွားရေးအောက်မှာ ယဉ်ကျေးမှုဆိုတာ ထွန်းကား
ခွင့်ရှိနေတော့ ကဗျာဆိုတာလည်း အဲဒီနည်းနဲ့ တိုး
တက်ဖြစ်ထွန်းရတာပါ။ ဘာပဲဖြစ်ဖြစ် ကဗျာဆိုတာက
တော့ တိုင်းပြည်ရဲ့အိမ်ဦးခန်းမှာ လူရိုသေ၊ ရှင်ရိုသေ
ထားရမှာတော့ အမှန်ပါပဲ။ ကဗျာဆရာတွေအားလုံး
ကိုလည်း တိုင်းပြည်ရဲ့ အိမ်ဦးခန်းမှာ ထားသင့်တယ်
လို့ ကျွန်တော် ယုံကြည်ပါတယ်။

ကိုချောနွယ်တို့အုပ်စုတွေဟာ မြန်မာ့ကဗျာလမ်းမကြီး
သစ်လွင်လှပဖို့အတွက် ရှေ့တန်းကနေ တောတွေ
တောင်တွေ၊ ချုံနွယ်ပိတ်ပေါင်းတွေ၊ ချောင်းတွေ၊
မြစ်တွေကိုဖြတ်ပြီး လမ်းဖောက်နေသူတွေလို့ ဆိုချင်
တာပေါ့။

ဟုတ်ကဲ့။ ကျွန်တော်ဟာ ဒီကဗျာလမ်းမကြီး
ဖောက်လုပ်ရာမှာ အပင်ပန်းခံဆုံး၊ တာဝန်အရှိဆုံး
လို့ သဘောထားပြီး ဒီတာဝန်ကို ကြီးလေးစွာ ထမ်း
ဆောင်နေပါတယ်။ ကျွန်တော်နဲ့အတူ ခေတ်ပြိုင်ကဗျာ
ဆရာတွေ၊ လူငယ်ကဗျာဆရာတွေလည်း ရှိနေ၊ ထမ်း
ပိုးနေကြပါတယ်။

ဘာကြောင့် ဒီအလုပ်တွေကို လုပ်နေကြတာလဲ။

ယုံကြည်ချက်ကြောင့်ဆိုပါတော့။ ကျွန်တော်တို့အူတွေ
မှာ မီးခိုးတလူလူထွက်နေပါပြီ။ သွေးစိမ်းရှင်ရှင် ဒဏ်
ရာတွေကို အနုပညာနဲ့သွေးတိတ်စေခဲ့ပါတယ်။
အသစ်ကို… သေခြင်း နေခြင်းကို နှမြောတွန့်ဆုတ်မှု
မရှိဘဲ ရှာဖွေနေပါတယ်။ ဘယ်ဆုတံဆိပ်ကိုမှ မျှော်လို့
မဟုတ်ပါဘူး။

ဒဏ်ရာတွေကို အနုပညာဖြင့် သွေးတိတ်အောင်
ကုစားရင်း သွေးမတိတ်ဘဲ သွေးလွန်ပြီးသေသွား
ခဲ့ရင်ကော။

မွေးကတည်းက သေမိန့်ကျပြီးသားပါ။

သေခြင်း၊ နေခြင်းကို မနှမြောဘဲ အသစ်ကိုရှာဖွေ
နေကြတယ်ဆိုတော့ ဘဝကို မဆင်မခြင်နေရင်
တခြားကဗျာဆရာတွေလို မီးစာကုန်ဆီခန်းမဟုတ်ဘဲ
မုန်တိုင်းကြောင့် စောစီးစွာသေခဲ့ရင်ကော။

ကဗျာကိုဖက်ပြီး အသေခံသွားမှာပါပဲ။ ဘဝကို ဆင်
ဆင်ခြင်ခြင်နေဖို့တော့ ဘယ်တော့မှမစဉ်းစားပါဘူး။

မောင်သာနိုးကို ကဗျာဆရာတစ်ယောက်အနေနဲ့
လက်ခံလား။

မောင်သာနိုး(ခေါ်) မောင်သိင်္ဂါကို ကဗျာဆရာ
တစ်ယောက်အနေနဲ့ အသိအမှတ်မပြုနိုင်ပါဘူး။

မောင်စိမ်းခက်(ပြည်)ဘဝနဲ့၊ တေးရေးဆရာ သုခမိန်
လှိုင်ဘဝနဲ့ ရေးတဲ့ကဗျာတွေ ဘယ်ကဗျာတွေ ပိုကြိုက်
သလဲ။

သုခမိန်လှိုင်ဘဝနဲ့ ဒီနောက်ပိုင်းရေးတဲ့ကဗျာတွေ
လုံးဝမကြိုက်မိပါဘူး။

မောင်ချောနွယ်နဲ့ (SAME BATCH) (ဆိမ်းဘက်)
ကဗျာဆရာတွေအကြောင်း ပြောပြပါ။

ပြောချင်စိတ်မရှိလို့ မပြောပါရစေနဲ့။

နောက်ပေါက် ကဗျာဆရာလေးတွေထဲကကော
ဘယ်သူ့ကိုမျှော်လင့်ပါသလဲ။

မမျှော်လင့်ရဲသေးပါဘူး။ အားကိုးဖို့စောပါသေးတယ်။
လူငယ်တွေ ကြိုးစားနေတာ တွေ့ရပါတယ်။

ခေတ်ပေါ်ကဗျာကို နားလည်ခံစားနိုင်ဖို့အတွက် I.Q
မြင့်ဖို့လိုအပ်တယ်ဆိုတဲ့ကိစ္စက တော်တော် ဂယက်
ရိုက်သွားတယ်။ အဲဒီစကားကို မပြင်တော့ဘူးလား။

မပြင်တော့တဲ့အပြင် ခေတ်ပေါ်ကဗျာကို ခံစားနား
လည်နိုင်ဖို့အတွက် I.Q မြင့်ရုံမကဘူး E.Qပါ မြင့်ဖို့
လိုအပ်နေပြီဆိုတာ ညက ဆွေးနွေးဝိုင်းက ရရှိခဲ့ပါ
တယ်။

E.Q ဆိုတဲ့အဓိပ္ပါယ်က…။

EMOTIONAL QUOTIENT ခံစားမှုစွမ်းရည်ကို
ပြောတာပါ။

ဟုတ်ကဲ့။ ကမ္ဘာ့ဝိညာဉ်နဲ့စကားပြောခြင်းစကားဝိုင်းကို
I.Q ၊ E.Q တွေနဲ့ ပိတ်လိုက်ကြပါစို့။

ဟုတ်ကဲ့။ လူသားအားလုံး I.Q ၊ E.Q မြင့်မားကြ
ပါစေ။

(မောင်ချောနွယ်သို့ အင်တာဗျူး''စာအုပ်မှ---)